Hvað er frestun greiðslna?

Frá og með 1. júlí hefst frestun greiðslna þegar umsókn um greiðsluaðlögun einstaklinga hefur verið samþykkt af umboðsmanni skuldara. Þeir sem sóttu um fyrir 1. júlí 2011 fengu frestun greiðslna þegar umsókn um greiðsluaðlögun einstaklinga var móttekin af umboðsmanni skuldara. 

Samkvæmt lögum um greiðsluaðlögun einstaklinga eru lagðar skyldur á bæði kröfuhafa og umsækjendur á fresttímanum. Vakin skal athygli á því að ef umsækjendur uppfylla ekki skyldur sínar meðan á frestun greiðslna varir getur það leitt til þess að samningur um greiðsluaðlögun komist ekki á. Frestun greiðslna er auglýst í Lögbirtingablaði til að kröfuhafar viti að frestun er hafin.  

Skyldur þínar meðan á frestun greiðslna varir

Tekjur þínar og bankareikningar

Þú mátt ekki stofna til nýrra skulda meðan frestun varir. Viðskiptabankinn þinn hefur því heimild til að loka reikningum með yfirdráttarheimild, greiðsluþjónustureikningum og kreditkortum.

•  Þú þarft að stofna nýjan síhringireikning án yfirdráttarheimildar í samráði við bankann. Láttu launagreiðanda þinn vita af nýja reikningnum til að launin skili sér örugglega.
• Hafðu samband við viðeigandi bankastofnun eða kreditkortafyrirtæki vegna kreditkorta og athugaðu hvort heimild til úttekta breytist eða ekki.
•  Þú þarft að stofna eða velja reikning til að leggja inná það fé sem er umfram það sem þarf til rekstur heimilis og bifreiðar, ef hún er til staðar. Ef misbrestur er á þessu getur það leitt til frávísunar.

Rekstur heimilis og bíls

• Þú mátt greiða allt sem tengist nauðsynlegum daglegum rekstri heimilisins. Nota skal neysluviðmið umboðsmanns skuldara til viðmiðunar um hvað telst eðlilegur kostnaður við hvern lið eftir fjölskyldustærð.
• Þú mátt greiða allt sem tengist nauðsynlegum rekstri húsnæðis, s.s. fasteignagjöld, hússjóð, tryggingar vegna fasteignar og bíls, hita, rafmagn og síma. Það skal þó tekið fram að umsækjandi greiðir aðeins þær kröfur sem verða til eftir að frestun greiðslna hófst. Hafi t.d. verið skuld við hússjóð þegar þú sóttir um þá má ekki greiða hana, bara nýja reikninga.
• Þú mátt greiða húsaleigu og rekstrarleigu af bifreið ef þú ert með þessháttar samninga.
• Allan afgang af tekjum eftir rekstur heimilis þarf að leggja fyrir inn á safnreikning. Fjárhæðin sem þarna safnast verður notuð til að greiða niður skuldir þínar þegar frestun lýkur.
• Þú þarft að segja upp öllum samningum sem ekki eru nauðsynlegir rekstri heimilisins t.d. tryggingar af ferðavögnum o.fl. þessháttar.

Lán og vanskil (ef þau eru)

• Afborganir lána frestast og á fresttímanum má ekki greiða af þeim. Þetta á við um fasteignalán, bílalán, kreditkortaskuldir, yfirdrátt o.fl. sem stofnast hefur til áður en frestun greiðslna hófst hvort sem lán eru í skilum eða vanskilum.
• Ekki má heldur krefja ábyrgðarmenn um greiðslur af ofangreindum kröfum.

Eignir

• Þú mátt ekki láta af hendi eða veðsetja eignir og verðmæti sem gagnast geta kröfuhöfum sem greiðsla þegar frestuninni líkur. Markmiðið með samningi um greiðsluaðlögun er að ráða bót á fjárhagslegri stöðu umsækjanda og til að svo megi vera þarf að gæta jafnræðis um þá fjármuni sem hugsanlega eiga að ganga upp í kröfur síðar meir.
• Ef þú færð kauptilboð í eignir á meðan á frestun greiðslna stendur hvetur umboðsmaður skuldara þig til að hafa samband og fá leiðbeiningar.
• Kröfuhafi má ekki gjaldfella skuld, gera fjárnám, framkvæma kyrrsetningu, krefjast löggeymslu í eigum þínum eða að fá eigur þínar seldar nauðungarsölu né krefjast gjaldþrotaskipta.

Skyldur kröfuhafa meðan á frestun greiðslna varir

Hefðbundin lán frestast s.s. fasteignaveðkröfur, skattskuldir, LÍN, kreditkort, yfirdrættir, bílalán og bílasamningar og kröfuhafar mega ekki taka við greiðslum vegna þeirra. Auk þessa hafa fjármálafyrirtæki heimild til að loka kreditkortum og reikningum með yfirdráttarheimildum, en umsækjanda verður gefinn kostur á að opna nýjan launareikning með síhringikorti eða korti með öðrum notkunareiginleikum og/eða fyrirframgreiddu kreditkorti.

Hvað má kröfuhafi gera?

• Bankinn má loka öllum reikningum þínum sem eru með yfirdráttarheimild.
• Banki eða kortafyrirtækið má loka öllum eftirágreiddum kreditkortum en ekki plúskortum.
• Loka greiðsluþjónustureikningum.
• Gjaldfella fjölgreiðslur á kreditkortum.

Hvað verður kröfuhafi gera?

•  Hætta að taka við greiðslum vegna skulda.
• Hætta öllum innheimtuaðgerðum og hætta að taka við greiðslum frá þér og/eða ábyrgðarmönnum.
• Hætta að senda þér greiðsluseðla (þess má geta að greiðsluseðlar geta í einhverjum tilfellum birst í netbanka, þér ber þó ekki að greiða þá á meðan þú nýtur greiðsluskjóls).
• Fella niður allar sjálfvirkar skuldfærslur og beingreiðslur af lánum, kreditkortum og inn á greiðsluþjónustureikninga.
• Ef um uppsafnaðar skuldir er að ræða sem tengjast daglegum rekstri heimilisins s.s. vegna hita og rafmagns eða símanotkunar þá frestast þær einnig. Þrátt fyrir vanskil má kröfuhafi ekki neita að afhenda umsækjanda, gegn staðgreiðslu eða viðunandi tryggingu, vöru eða þjónustu sem umsækjandi þarf á að halda vegna framfærslu. Sömu kröfuhafar ættu því t.d. að opna fyrir hita- og rafmagnsþjónustu og senda venjulega greiðsluseðla vegna þeirra þrátt fyrir eldri skuld.

Hvað má kröfuhafi ekki gera?

• Krefja ábyrgðarmenn þína um greiðslu skulda.
• Gjaldfella skuld, gera fjárnám, framkvæma kyrrsetningu, krefjast löggeymslu í eigum þínum eða að fá eigur þínar seldar nauðungarsölu.
• Krefjast gjaldþrotaskipta.