Aðstoð vegna greiðslu skiptakostnaðar
Markmið
Að gera einstaklingum sem eiga í verulegum greiðsluerfiðleikum og hafa árangurslaust leitað annarra greiðsluvandaúrræða kleift að krefjast sjálfir skipta á búi sínu.
Aðstoð vegna greiðslu skiptakostnaðar er ókeypis úrræði.
Fyrir hverja er aðstoð vegna skiptakostnaðar?
- Aðstoð vegna skiptakostnaðar getur hentað fyrir þá einstaklinga sem eiga í verulegum greiðsluerfiðleikum og hafa árangurslaust leitað annarra greiðsluvandaúrræða og hyggjast krefjast gjaldþrotaskipta á búi sínu.
- Uppfylla þarf ákveðin skilyrði sem fram koma í lögum um fjárhagsaðstoð til greiðslu tryggingar fyrir kostnaði vegna gjaldþrotaskipta.
- Ráðgjafi hjá okkur getur aðstoðað við að meta hvort úrræðið henti.
Hvernig er sótt um aðstoð vegna skiptakostnaðar og hvernig er ferlið?
- Sótt er um aðstoð vegna fjárhagsvanda rafrænt, notast þarf við rafræn skilríki eða íslykil.
- Við umsókn sækir umboðsmaður skuldara upplýsingar um tekjur, eignir og skuldir og metur næstu skref í samráði við umsækjanda.
- Umsækjandi þarf sjálfur að veita upplýsingar um útgjöld sín vegna framfærslu.
Niðurstaða umsóknar um aðstoð vegna skiptakostnaðar getur falið í sér:
- Samþykki umsóknar og upplýsingagjöf um næstu skref.
- Synjun umsóknar en leiðbeiningar um önnur greiðsluvandaúrræði.
- Synjun umsóknar en upplýsingagjöf um gjaldþrot, geti umsækjandi með einhverju móti sjálfur fjármagnað skiptatrygginguna og önnur/vægari úrræði duga ekki til að leysa vanda umsækjanda.
- Sama hver niðurstaða umsóknar er þá fær umsækjandi yfirlit yfir fjárhagsstöðu sína.
Hvað gerist áður en hægt er að samþykkja umsókn um fjárhagsaðstoð ?
- Farið yfir umsókn og kallað eftir öllum upplýsingum sem nauðsynlegar eru til að fá skýra mynd af fjárhagslegri stöðu umsækjanda.
- Umsækjandi þarf að uppfylla ákveðin lögbundin skilyrði til að umsókn hans verði samþykkt.
- Við mat á umsóknum er farið ítarlega yfir fjárhag umsækjenda með tilliti til eigna, tekna og skulda og er þá a.m.k. litið til síðustu fjögurra ára.
- Skilyrði er að síðustu 4 skattframtölum hafi verið skilað.
- Greina þarf hvort umsækjandi muni hafa aðra fjármuni en atvinnutekjur til að greiða af skuldum , s.s. vegna sölu eigna eða fjárframlaga annarra.
- Umboðsmaður skuldara staðreynir tekjur umsækjanda, samkvæmt opinberum gögnum, og veltu (samanlagðar innborganir) á bankareikningum í eigu umsækjanda.
- Sé misræmi á tekjum samkvæmt opinberum gögnum og veltu á bankareikningum er nauðsynlegt að umsækjandi veiti skýringar á því.
- Framfærslukostnaður er áætlaður skv. framfærsluviðmiði embættisins ásamt öðrum uppgefnum kostnaði frá umsækjanda. Nauðsynlegt er að með umsókn fylgi gögn til staðfestingar þeim upplýsingum sem hún hefur að geyma, þ. á m. uppgefnum kostnaði varðandi húsaleigu, rekstur húsnæðis og annan mánaðarlegan kostnað.
- Sé vafi um að umsækjandi uppfylli skilyrði til að leita fjárhagsaðstoðar vegna skiptakostnaðar þá er honum sent bréf/tölvupóstur (andmælabréf) þar sem honum er veitt færi á að koma sínum skýringum að og að og leggja fram gögn innan tiltekins frests.
Hvað tekur við þegar umsókn hefur verið samþykkt?
- Umsækjandi sækir gögn til umboðsmanns skuldara og fer með þau í héraðsdóm í því umdæmi sem lögheimili hans er.
- Umsækjandi þarf sjálfur að greiða 19.000 kr. þingfestingargjald þegar hann leggur gögnin fram hjá héraðsdómi.
- Umboðsmaður skuldara greiðir skiptatrygginguna, 250.000 kr., beint til héraðsdóms þegar málið er tekið fyrir.
- Umsækjandi er boðaður í héraðsdóm þegar mál hans verður tekið fyrir. Mikilvægt er að hann mæti því annars verður litið svo á að hann sé fallin frá kröfu um gjaldþrotaskipti.
- Dómari metur hvort umsækjandi uppfylli skilyrði fyrir því að fá bú sitt tekið til gjaldþrotaskipta.
- Nánar um gjaldþrotaskipti hér.
Umsókn synjað ?
- Ef umsókn um aðstoð vegna skiptakostnaðar er synjað þá getur umsækjandi kært ákvörðunina til félagsmálaráðuneytis. Kæran er rafræn og er kærueyðublað sótt á vef stjórnarráðsins.
Umsókn um aðstoð vegna skiptakostnaðar felur ekki í sér:
- Almenna lögfræðilega ráðgjöf eða aðstoð við mál sem eru einkaréttarlegs eðlis.
- Að veita lögfræðilega ráðgjöf varðandi til dæmis einstakar kröfur og lögmæti þeirra.
- Aðstoð við að telja fram til skatts og/eða veita leiðbeiningar um skattamál.
- Að umboðsmaður skuldara úrskurði um ógjaldfærni umsækjanda eða leggi fram kröfu um gjaldþrotaskipti fyrir hans hönd.
- Að umsækjandi fái skiptatrygginguna greidda inn á eigin reikning.
Ef þú ert óviss um hver næstu skref ættu að vera þá getur þú haft samband í síma 512-660.
Þú getur einnig pantað símtal frá okkur og fengið nánari upplýsingar um þá þjónustu sem við bjóðum upp á.
Umsókn um aðstoð vegna fjárhagsvanda